El ciclu de cine itinerante de Llaboral Cinemateca incorpora esti trimestre una sede de proyección nueva, el Teatru Clarín de Sotu

La cartelera fórmenla los llargumetraxes Mines de Figareo d’Alberto Vázquez, Jinetes de la justicia d’Anders Thomas Jensen, Adiós, idiotas d’Albert Dupontel  y La vida era eso de David Martín de los Santos

24/01/2022.- El cine contemporaneu vuelve a rodar pelos conceyos asturianos de la mano de La Cinemateca Ambulante, que programa pa esti trimestre un total de 103 proyecciones que se van facer nos 22 conceyos collaboradores d’esta edición. La Cinemateca Ambulante ye’l ciclu de cine itinerante de Llaboral Cinemateca, l’espaciu dedicáu al sector creativu cinematográficu y audiovisual promovíu pola Conseyería de Cultura, Política Llingüística y Turismu, al traviés de Llaboral Ciudá de la Cultura. La programación cinematográfica ufiertada por La Cinemateca Ambulante ta coordinada pol Festival Internacional de Cine de Xixón.

El Conceyu de Sotu’l Barcu súmase esti trimestre al programa cinematográficu que va ufiertar, del miércoles 26 de xineru p’arriba, cuatro títulos en versión orixinal subtitulada n’español y con entrada gratuita. Collaboren tamién nesta ocasión los conceyos d’A Veiga, Cabrales, Cangas del Narcea, Cangues d’Onís, Castrillón, Colunga, Gozón, Ḷḷena, Llanera, Llanes, Llangréu, Nava, Navia, Noreña, Piloña, Ribadeva, Ribeseya, Siero, Tinéu, Valdés y Villaviciosa.

Depués de la so estrena na sección Esbilla del Festival Internacional de Cine de Xixón, llega a La Cinemateca Ambulante la película Mines de Figareo. Memoria d’una llucha (1978-1980) del cineasta mierense Alberto Vázquez, un documental sobre ún de los conflictos más importantes na minería asturiana nos años de la transición española. Primeros meses de 1978. Mines de Figareo fore una de les empreses carboníferes más rentables. La familia ama de la mina lleva años esplotando les capes de forma irracional y, ensin remediu, llega l’avisu de pesllar. Entamen entós dos años de llucha qu’acaba en 1980 cola nacionalización de la esplotación. Dos años de guerrilla urbana en defensa de los puestos de trabayu que culminen col sonáu episodiu en que cuatro miembros de les Comisiones Obreres retuvieron al patrón no alto del castillete 10 hores.

Un gran Mads Mikkelsen (Hannibal, Otra ronda, Casino Royale) protagoniza Jinetes de la justicia d’Anders Thomas Jensen, un thriller nórdicu cargáu d’humor negro, tresgresor y políticamente incorrecto que reventó les taquilles del so país d’orixe y que llevó nada menos que cuatro gallardones nos Danish Film Awards, incluyendo’l de meyor actor. El militar Markus tien que volver pa casa cola fía adolescente, Mathilde, cuando la muyer muerre nun accidente de tren tráxicu. Too paez ser cosa de la mala suerte pero Otto, espertu en matemátiques y tamién pasaxeru del tren siniestráu, ta convencíu de qu’hai daquién detrás de too esto.

Otru númberu ún na taquilla, nesti casu en Francia, y qu’arrasó nos Premios César llevando siete gallardones (incluyendo a meyor película y meyor dirección) ye Adiós, idiotas, una traxicomedia tienra y absurda dirixida, y protagonizada, por Albert Dupontel que cunta la historia d’una muyer mui enferma (Virginie Efira) en busca del fíu, a quien se vio obligada a abandonar cuando tenía quince años. Pel camín va atopase con un home depresivu y un ciegu que la van acompañar na odisea. 

Completa’l programa d’esti trimestre el debut nel llargumetraxe del realizador David Martín de los Santos que, con La vida era eso, opta a dos Premios Goya (a meyor director novel y meyor actriz pa Petra Martínez). María (Petra Martínez) y Verónica (Anna Castillo) son dos inmigrantes españoles de distintes xeneraciones que s’atopen nun hospital en Bélxica. Ellí empieza a medrar una rellación d’amistá hasta qu’un acontecimientu inesperáu va llevar a María a entamar un viaxe al sur d’España en busca de la familia de Verónica.

Información completa de les proyecciones, feches y horarios na web www.laboralcinemateca.es